गडचिरोली | --°C | --°C |
गडचिरोली, ता.३: अल्पवयीन मुलीस पळवून नेऊन तिच्यावर अत्याचार करणाऱ्या आरोपीस येथील विशेष सत्र न्यायालयाने ६ वर्षांचा कारावास व ५ हजार रुपये दंडाची शिक्षा ठोठावली आहे. पवित्र उर्फ शशांक परिमल सरकार रा.कालीनगर, ता.मुलचेरा असे दोषी इसमाचे नाव आहे.
४ फेब्रुवारी २०१६ च्या संध्याकाळी पीडित मुलगी शाळेतून घरी परत आल्यानंतर ती आपल्या बहिणीच्या घराकडे जात होती. एवढ्यात शशांकने तिचा कुरकुऱ्याचे पॉकिट देण्याचे आमिष दाखवून मोटारसायकलवर बसविले. नंतर तो तिला गांधीनगर रस्त्यावरील जंगलात घेऊन गेला आणि तिच्या लैंगिक अत्याचार करण्याचा प्रयत्न केला. एवढ्यात एक इसम सायकलने येताच आरोपी शशांक हा पळून गेला. पीडित मुलीच्या आईने तक्रार केल्यानंतर पोलिसांनी आरोपी शशांक सरकार यास अटक केली. पोलिस उपनिरीक्षक संदीप कापडे यांनी तपास पूर्ण करुन न्यायालयात दोषारोपपत्र दाखल केले. काल(ता.२)या प्रकरणाचा निकाल लागला. विशेष सत्र न्यायालयाने सर्व साक्षदारांचे बयाण नोंदवून व सरकारी पक्षाचा युक्तीवाद ग्राह्य मानून आरोपी शशांक सरकार यास ६ वर्षांचा सश्रम कारावास व ५ हजार रुपये दंडाची शिक्षा ठोठावली. सरकारी पक्षातर्फे जिल्हा सरकारी वकील अनिल प्रधान यांनी काम पाहिले.