गडचिरोली | --°C | --°C |
गडचिरोली,ता.२१: पद्मश्री डॉ.प्रकाश आमटे यांच्या लोकबिरादरी प्रकल्पाद्वारे संचालित नेलगुंडा येथील साधना विद्यालयात आज विद्यार्थी व पालकांसाठी ‘ओपन डे’ कार्यक्रमाचे आयोजन करण्यात आले होते. यावेळी हेमलकसा येथील लोकबिरादरी विद्यालयाच्या विद्यार्थ्यानी व्यसनमुक्ती व कुर्मा घर या दोन समस्यांवर पथनाट्य सादर करुन जनजागृती केली.
पद्मश्री डॉ.प्रकाश आमटे व डॉ. सौ. मंदाताई आमटे यांच्या लोकबिरादरी प्रकल्पाने भामरागड तालुक्यातील नेलगुंडा या अतिदुर्गम गावात ५ मे २०१५ रोजी साधना विद्यालय ही इंग्रजी माध्यमाची शाळा खास लोक आग्रहास्तव सुरु केली. या शाळेत ११ गावांतील १३१ आदिवासी विद्यार्थी बालवाडी ते ५ वीपर्यंतचे शिक्षण घेत आहेत. आज हे विद्यार्थी, पालक व गावकऱ्यांसाठी ओपन डे कार्यक्रम आयोजित करण्यात आला. यावेळी भामरागड येथील एकात्मिक आदिवासी विकास प्रकल्पाचे प्रकल्प अधिकारी मनुज जिंदल(आयएएस) व अहेरी येथील उपजिल्हा रुग्णालयाचे वैद्यकीय अधीक्ष्क डॉ.कन्ना मडावी प्रमुख अतिथी म्हणून उपस्थित होते. शाळेचे संचालक अनिकेत आमटे व समीक्षा आमटे यांनी शाळेविषयी माहिती दिली. याप्रसंगी पाचवीच्या विद्यार्थ्यांनी मनुज जिंदल यांच्याशी चक्क इंग्रजीतून संवाद साधला. माडिया जमातीची मुलं इंग्रजी बोलत असल्याचे बघून श्री.जिंदल यांनी त्यांचे कौतुक केले. पालक व गावकऱ्यांनीही विविध खेळांमध्ये सहभाग नोंदविला. विद्यार्थ्यांनी सांस्कृतिक कार्यक्रमाद्वारे गावकऱ्यांना मनोरंजनाची मेजवानी दिली.