ठळक बातम्या

• संत निरंकारी मंडळाच्या शिबिरात १८८ ..
• रानटी हत्तीच्या हल्ल्यात हिदूर येथ..
• आचारसंहितेचा भंग; भाजपच्या दोन नेत्..
• रानटी हत्तीने घेतला शेतकऱ्याचा बळी,..
• दीड लाखांचे बक्षीस असलेल्या नक्षल स..
• गडचिरोली-चिमूर लोकसभा क्षेत्र:सरकार..
• लॉयड्सच्या ५० अधिकारी आणि कर्मचाऱ्य..
• गडचिरोली-चिमूर लोकसभा मतदारसंघात ७१..

बंडुभाऊ लांजेवार/कुरखेडा, ता.८: आज शालांत परिक्षेचा निकाल लागल्यानंतर विद्यार्थी 'कही खुशी, कहीं गम', असा अनुभव घेत असताना परीक्षा दिलेल्या कुरखेड्याच्या एका विद्यार्थिनीला गैरहजर दाखविल्याचे कळताच धक्काच बसला.

संस्कृती सुरेश दहीकर असे या विद्यार्थिनीचे नाव आहे. ती कुरखेडा येथील शिवाजी हायस्कूलमध्ये शिकत होती. यंदा तिने अन्य विद्यार्थ्यांप्रमाणेच दहावीची परीक्षा दिली. शिवाजी हायस्कूल येथेच तिचे परीक्षा केंद्र(केंद्र क्रमांक १९५३) होते. तिने सर्व विषयांचे पेपर दिले होते. 

आज महाराष्ट्र राज्य माध्यमिक व उच्चमाध्यमिक शिक्षण मंडळाने दहावीचा निकालाची घोषणा केली. मात्र, गुणपत्रकावर मराठी विषयात 'अनुपस्थित' दाखविण्यात आल्याचे दिसताच संस्कृतीला धक्काच बसला. दुपारपासून ती हुंदके देत रडत होती. तिने ही बाब आपल्या शिक्षकांना सांगितली. त्यांनी संस्कृतीची समजूत काढत ही चूक परीक्षा मंडळाची असल्याचे सांगितले.

संस्कृती ही हुशार मुलगी असून, तिला गणितात ८३, सामाजिक विज्ञान विषयात ८३, विज्ञान व तंत्रज्ञान विषयात ७५, इंग्रजीत ५४ व हिंदीत ५५ गुण आहेत. मराठी विषयातही आपणास किमान ५५ गुण मिळाले असते, असे तिचे म्हणणे आहे. मात्र, पेपर देऊनही अनुपस्थित दर्शविल्याने संस्कृती प्रचंड निराश झाली आहे. संस्कृतीचे वडील वनरक्षक असून, आई अंगणवाडी सेविका आहे. तिच्या सर्वांत मोठ्या बहिणीने एम.एस.सीचे शिक्षण पूर्ण केले आहे, तर दुसरी बहीणदेखील एमएससी करीत आहे. हुशार विद्यार्थिनीवर असा प्रसंग ओढवला असेल, तर सर्वसामान्य विद्यार्थिनींचे काय, शिक्षण मंडळ आपली चूक दुरुस्त करुन देईल काय, असे प्रश्न यानिमित्ताने उपस्थित केले जात आहेत.