गडचिरोली | --°C | --°C |
गडचिरोली, ता.२८: ग्रामीण पाणीपुरवठ्याच्या कामाचे देयक मंजूर करुन दिल्याचा मोबदला म्हणून तक्रारकर्त्या कंत्राटदाराकडून ६ हजार रुपयांची लाच स्वीकारताना लाचलुचपत प्रतिबंधक विभागाच्या अधिकाऱ्यांनी आज गडचिरोली जिल्हा परिषदेच्या ग्रामीण पाणीपुरवठा विभागाचा उपविभागीय अभियंता रमेश सोमाजी शेंडे(५२) यास रंगेहाथ पकडून अटक केली.
एसीबीने दिलेल्या माहितीनुसार, तक्रारकर्ता हा गडचिरोली येथील रहिवासी असून, राष्ट्रीय पेयजल योजनेंतर्गत गडचिरोली उपविभागातील ग्रामपंचायतींतर्गत ग्रामीण पाणीपुरवठ्याबाबतच्या शासकीय कंत्राटदारीचे काम करतो. त्याने केलेल्या जुन्या कामाचे देयक उपविभागीय अभियंता श्री.शेंडे याने मंजूर करुन दिले. या कामाचा मोबदला म्हणून त्याने तक्रारकर्त्यास २ टक्के याप्रमाणे ६ हजार रुपयांची लाच मागितली.
मात्र, लाच देण्याची तक्रारकर्त्याची मुळीच इच्छा नसल्याने त्याने गडचिरोलीच्या लाचलुचपत प्रतिबंधक विभागाकडे तक्रार केली. त्यानुसार या विभागाच्या अधिकाऱ्यांनी आज सापळा रचला असता, उपविभागीय अभियंता रमेश शेंडे यास तक्रारकर्त्याकडून ६ हजार रुपयांची लाच स्वीकारताना पंचांसमक्ष रंगेहाथ पकडले. त्यामुळे एसीबीने त्याच्याविरुद्ध लाचलुचपत प्रतिबंधक कायदा १९८८ च्या कलम ७,१३(१)(अ)अन्वये गडचिरोली पोलिस ठाण्यात गुन्हा दाखल केला.
लाचलुचपत प्रतिबंधक विभागाचे पोलिस उपायुक्त पी.आर.पाटील यांच्या मार्गदर्शनाखाली पोलिस अधीक्षक डी.एम.घुगे, पोलिस निरीक्षक रवी राजुलवार, हवालदार प्रमोद ढोरे, नथ्थू धोटे, सतीश कत्तीवार, सुधाकर दंडीकवार, महेश कुकुडकर, गणेश वासेकर, किशोर ठाकूर, सुभाष सालोटकर, सोनल आत्राम, सोनी तावाडे, तुळशीदास नवघरे,घनश्याम वडेट्टीवार यांनी ही कारवाई केली