गडचिरोली | --°C | --°C |
गडचिरोली,ता.१९: गडचिरोली जिल्हा परिषदेच्या सिंचन विभागाच्या ‘माजी मालगुजारी तलावांची पुनर्बांधणी व बळकटीकरण’ लेखाशीर्षांतर्गत् युनियन बँकेत असलेल्या निधीतून बनावट धनादेशाद्वारे २ कोटी ८६ लाख १३ हजार ८५१ रूपयांची उचल केल्याची खळबळजनक घटना उघडकीस आली आहे. याप्रकरणी उपविभागीय अभियंता भूमेश दमाहे यांनी गडचिरोली पोलिस ठाण्यात तक्रार केली असून, पोलिसांनी अज्ञात इसमाविरुद्ध गुन्हा दाखल केला आहे.
पोलिसांनी दिलेल्या माहितीनुसार, जिल्हा परिषदेच्या सिंचन विभागांतर्गत ‘माजी मालगुजारी तलावांची पुनर्बाधणी व बळकटीकरण’ लेखाशीर्षांत गडचिरोली येथील युनियन बँकेच्या खात्यात सुमारे ६ कोटी रुपये जमा करण्यात आले होते. अलीकडेच या खात्याची तपासणी केली असता लेखाशीर्ष व बँकेतील रकमेचा ताळमेळ जुळून आला नाही. याबाबत संबंधित अधिकाऱ्यांनी बँकेत जाऊन शहानिशा केली असता मूळ धनादेश जिल्हा परिषदेकडे असून, एका बनावट धनादेशाद्वारे २ कोटी ८६ लाख १३ हजार ८६१ रुपयांची उचल करण्यात आल्याचे निदर्शनास आले. यासाठी संबंधित अधिकाऱ्यांच्या स्वाक्षऱ्या स्कॅन करुन वापरण्यात आल्या. तसेच बनावट पत्रसुद्धा तयार करण्यात आले. ३ जून २०१९ रोजी हे बनावट पत्र तयार करुन ७ जून रोजी धनादेश बँकेत जमा करण्यात आला. बनावट पत्रावर असलेल्या पाच खाते क्रमांकावर १० जून रोजी आरटीजीएसद्वारे ही रक्कम वळती करण्यात आली. भंडारा, वरोरा, चंद्रपूर, वर्धा अशा विविध ठिकाणच्या बँकांमधून आरोपीने रकमेची उचल केली असल्याचा धक्कादायक प्रकार बँकेच्या अहवालातून निदर्शनास आला आहे. सिंचन विभागाचे उपविभागीय अभियंता भूमेश दमाहे यांनी आज गडचिरोली पोलिस ठाण्यात तक्रार केली. तक्रारीवरुन गडचिरोली पोलिसांनी अज्ञात आरोपीविरुद्ध अपराध क्रमांक. ४५८/२०१९, भादंवि कलम ४२०,४६५, ४६७,४६८, ४७१,३४ अन्वये गुन्हा दाखल केला आहे. पोलिस निरीक्षक प्रदीप चौगावकर हे प्रकरणाचा तपास करीत आहेत.
मोठी रक्कम लंपास करण्यास आशीर्वाद कुणाचा?
गडचिरोली जिल्हा परिषदेत अनेक कामांत गैरव्यवहार होत असतो. यापूर्वी अनेक रस्त्यांची कामे न करताच देयके उचलण्यात आली आहेत. कुठे गरज नसताना जाणीवपूर्वक अंदाजपत्रक तयार करुन निधी लाटण्याचे काम होत आहे. सिंचन विभागात झालेला गैरव्यवहार अशा काही भ्रष्ट लोकप्रतिनिधींच्या आशीर्वादाने तर झाला नाही ना, अशी शंका घेण्यास बराच वाव आहे.