गडचिरोली | --°C | --°C |
गडचिरोली, ता.२७: येथील प्लॅटिनम ज्युबिली हायस्कूलचा सातव्या वर्गातील विद्यार्थी ओम पंकज बोंद्रे याने हिमाचल प्रदेशातील सिमला(रोहू) येथे झालेल्या राष्ट्रीय सिकाई मार्शल आर्ट स्पर्धेत प्रत्येकी एक सुवर्ण व कांस्य पदक पटकावले आहे.
भारतीय क्रीडा प्राधिकरण, युवा कार्य व क्रीडा मंत्रालयाद्वारे मान्यताप्राप्त सिकाई फेडरेशन ऑफ इंडियांतर्गत सिकाई असोसिएशन हिमाचलप्रदेश यांच्या वतीने २० ते २३ ऑगस्टदरम्यान ही स्पर्धा घेण्यात आली. यापूर्वी २ व ३ ऑगस्ट रोजी नाशिक येथे पार पडलेल्या राज्यस्तरीय सिकाई मार्शल आर्ट स्पर्धेत ओमने दोन सुवर्णपदके प्राप्त करीत क्रीडा तज्ज्ञांची मने जिंकली होती. आता राष्ट्रीय स्पर्धेत चमकदार कामगिरी केल्याने ओमला आंतरराष्ट्रीय स्पर्धेत खेळण्याची संधी मिळणार आहे. ओमचे वडील बिल्डर असून, आई गृहिणी आहे.
या यशाबद्दल प्लॅटिनम ज्युबिली एज्युकेशन सोसायटीचे सचिव अझिझ नाथानी, संचालक निझार देवानी, प्राचार्य प्रदीप मिस्त्री यांनी ओमचे अभिनंदन केले आहे.