गडचिरोली | --°C | --°C |
गडचिरोली,ता.१५: कुरखेडा तालुक्यातील जांभूळखेडा गावाजवळ महाराष्ट्रदिनी झालेल्या भूसुरुंगस्फोटप्रकरणी पोलिसांनी दोन जणांना अटक केली आहे. दिलीप श्रीराम हिडामी (२२) व परसराम मनिराम तुलावी(२८) अशी अटकेतील आरोपींची नावे असून, दोघेही कुरखेडा तालुक्यातील लवारी येथील रहिवासी आहेत. दोघेही नक्षली असल्याचे पोलिसांनी म्हटले आहे.
१ मे रोजी नक्षल्यांनी कुरखेडा तालुक्यातील जांभूळखेडा गावाजवळ घडविलेल्या भूसुरुंगस्फोटात १५ पोलिस व एक खासगी वाहनचालक शहीद झाले होते. याप्रकरणी ११ जूनला पोलिसांनी माओवादी कम्युनिस्ट पार्टीची पश्चिम सबझोनल प्रमुख नर्मदाक्का व तिचा पती किरणकुमार यांना अटक केली. या दोघांना जांभूळखेडा भूसुरुंगस्फोट व अन्य गुन्ह्यांविषयी पोलिसांनी विचारणा केली असता त्यांनी लवारी येथील नक्षल सदस्यांमार्फत स्फोट घडविल्याची माहिती दिली. यावरुन तसेच अन्य तांत्रिक पुराव्यांवरुन पोलिसांनी दिलीप हिडामी व परसराम तुलावी यांना अटक केली आहे. त्यांच्याकडून मोठ्या प्रमाणावर नक्षल साहित्य जप्त करण्यात आले असून, न्यायालयाने त्यांना १२ दिवसांची पोलिस कोठडी सुनावली आहे.