गडचिरोली | --°C | --°C |
कोरची, ता.१० :सशस्त्र नक्षलवाद्यांनी आज संध्याकाळी साडेपाच वाजताच्या सुमारास तालुक्यातील कोटगुल पोलिस मदत केंद्रांतर्गत ढोलडोंगरी येथील कोंबडा बाजारात एका कंत्राटी आरोग्य सेविकेच्या पतीची गोळ्या झाडून हत्या केली. योगेंद्र मेश्राम,रा.बोटेझरी असे मृत इसमाचे नाव आहे.
बोटेझरी येथील कंत्राटी आरोग्य सेविका कस्तुरबा चंदू देवगडे हिचे पती योगेंद्र मेश्राम हे गडचिरोली नगर परिषदेच्या जवाहरलाल नेहरु विद्यालयात कलाशिक्षक म्हणून कार्यरत होते. दर शनिवारी ते पत्नीकडे यायचे. दरम्यान आज ढोलडोंगरी येथील कोंबडा बाजारात ते गेले होते. ही संधी साधून नक्षलवाद्यांनी त्यांनी गोळ्या झाडून हत्या केली. हत्येचे नेमके कारण कळू शकले नाही.
कोटगुल पोलिस मदत केंद्रात घटनेची नोंद करण्यात आली असून, गोळ्या झाडल्यानंतर योगेंद्र मेश्राम यांना कोटगूल येथील प्राथमिक आरोग्य केंद्रात दाखल करण्यात आले. मात्र, उपचाराआधीच त्यांचा मृत्यू झाल्याची माहिती वैद्यकीय अधिकारी जितेंद्र टेकाम यांनी दिली. उपविभागीय पोलिस अधिकारी शैलेश काळे घटनेचा तपास करीत आहेत.