गडचिरोली | --°C | --°C |
गडचिरोली, ता.२२: पंतप्रधान नरेंद्र मोदी हे बुधवारी(ता.२३)गडचिरोली-चिमूर लोकसभा क्षेत्रातील भाजपचे बूथ व शक्तीकेंद्र प्रमुख तसेच प्रमुख पदाधिकारी व लोकप्रतिनिधींशी संवाद साधणार असून, या कार्यक्रमाला केंद्रीय गृहराज्यमंत्री हंसराज अहीर उपस्थित राहणार असल्याची माहिती खा.अशोक नेते यांनी आज पत्रकार परिषदेत दिली.
खा.अशोक नेते यांनी सांगितले की, २३ जानेवारीला दुपारी दोन वाजता अभिनव लॉन येथे गडचिरोली-चिमूर लोकसभा क्षेत्रातील बूथ प्रमुख, पदाधिकारी व लोकप्रतिनिधींच्या संमेलनाचे उद्घाटन केंद्रीय गृहराज्यमंत्री हंसराज अहीर यांच्या हस्ते होणार आहे. या कार्यक्रमाला पालकमंत्री अम्ब्रिशराव आत्राम, आ.प्रा.अनिल सोले, आ.नागो गाणार, आ.डॉ.रामदास आंबटकर, आ.डॉ.देवराव होळी, आ.क्रिष्णा गजबे, आ.कीर्तिकुमार भांगडिया, आ.संजय पुराम यांच्यासह पक्षाचे माजी आमदार प्रा.अतुल देशकर, मितेश भांगडिया, केशवराव मानकर उपस्थित राहणार आहेत. त्यानंतर संध्याकाळी ५ वाजता पंतप्रधान नरेंद्र मोदी हे बूथ प्रमुख व पदाधिकाऱ्यांशी व्हीडिओ कॉन्फरंसींगद्वारे संवाद साधणार आहेत. गडचिरोली-चिमूर लोकसभा क्षेत्रात १८७१ बूथ व ३८९ शक्ती केंद्र प्रमुख आहेत. एका बूथमध्ये २५ सदस्यांचा समावेश असून, त्यांचा एक बूथप्रमुख आहे. तसेच ५ बुथांचे एक शक्तीकेंद्र आहे.
सुमारे अडीच हजार बूथप्रमुख, शक्तीकेंद्रप्रमुख, पदाधिकारी, लोकप्रतिनिधी या संमेलनाला उपस्थित राहणार आहेत. या कार्यक्रमाचे थेट प्रक्षेपण होणार असल्याची माहितीही खा.नेते यांनी दिली. पत्रकार परिषदेला आ.डॉ.देवराव होळी, नगराध्यक्ष योगीता पिपरे, भाजपचे जिल्हा संघटन महामंत्री रवींद्र ओल्लालवार, डॉ.भारत खटी, नगरसेवक प्रमोद पिपरे, शहराध्यक्ष सुधाकर येनगंधलवार, आदिवासी आघाडीचे जिल्हाध्यक्ष प्रकाश गेडाम, युवा मोर्चाचे जिल्हाध्यक्ष स्वप्निल वरघंटे, शहराध्यक्ष अनिल तिडके, भाजपचे तालुकाध्यक्ष विलास भांडेकर, महामंत्री श्रीकृष्ण कावनपुरे, बंडू झाडे, समीर शेख, फुलचंद वाघाडे, जावेद अली, प्रशांत अलमपटलावार उपस्थित होते.