गडचिरोली | --°C | --°C |
गडचिरोली, ता.२६: जादुटोणा करीत असल्याच्या संशयावरुन एका इसमाने महिलेची धारदार शस्त्राने हत्या केल्याची घटना काल(ता.२५)संध्याकाळी भामरागड तालुक्यातील लाहेरी येथे घडली. पाली गुंडरु मडावी(४२)असे मृत महिलेचे नाव आहे. याप्रकरणी पोलिसांनी आरोपी सरजू बुकलू बोगामी(२४)यास अटक केली आहे.
पाली मडावी ही जादुटोणा करते, असा सरजूला संशय होता. त्यामुळे त्याने पालीचा काटा काढण्याचा निश्चय केला. काल पाली मडावी ही आपल्या शेतावर गेली होती. सरजू हादेखील तिच्या शोधात गेला. संध्याकाळच्या सुमारास त्याने धारदार शस्त्राने पालीची हत्या केली. लाहेरी पोलिसांनी आरोपी सरजू बोगामी याच्यावर भादंवि कलम ३०२ अन्वये गुन्हा दाखल करुन अटक केली आहे. लाहेरी उपपोलिस ठाण्याचे प्रभारी अधिकारी घटनेचा तपास करीत आहेत.