ठळक बातम्या

• दीड लाखांचे बक्षीस असलेल्या नक्षल स..
• गडचिरोली-चिमूर लोकसभा क्षेत्र:सरकार..
• लॉयड्सच्या ५० अधिकारी आणि कर्मचाऱ्य..
• गडचिरोली-चिमूर लोकसभा मतदारसंघात ७१..
• १७ एप्रिल लक्षात ठेवा: गडचिरोली जिल..
• अशोक नेतेंच्या नावेला तारुन देण्यास..
• गडचिरोली:तपासणी पथकाने जप्त केली ११..
• आत्राम आणि वडेट्टीवारांच्या आरोप-प्..

गडचिरोली, ता.१५: नाकाबंदीदरम्यान पोलिसांच्या अंगावर वाहन चालवून त्यांना जिवे मारण्याचा प्रयत्न करणाऱ्या अवैध दारु वाहतूकदारास येथील सत्र न्यायालयाने ५ वर्षांचा सश्रम कारावास व २ हजार ६०० रुपये दंडाची शिक्षा ठोठावली आहे. प्रणव प्रेमांनद बाला, रा.विवेकानंदपूर, ता.मुलचेरा असे दोषी इसमाचे नाव आहे.

१८ नोव्हेंबर २०१० ची ही गोष्ट आहे. अहेरी पोलिस ठाण्याचे पोलिस उपनिरीक्षक श्री. पाटील हे आपल्या सहकारी पोलिसांसह व्यंकटरावपेठा ते देवलमरी रस्त्यावर नाकाबंदी करीत असताना त्यांना महिंद्रा पिकअप वाहन येताना दिसले. वाहन अडविण्याचा प्रयत्न करताच वाहनचालक प्रणव प्रेमानंद बाला याने वाहन न थांबविता ते पोलिसांच्या अंगावर नेले. यावेळी पोलिसांनी प्रसंगावधान राखून आरोपी प्रणव बाला यास घटनास्थळीच पकडले. पोलिसांनी वाहनाची तपासणी केली असता त्यात देशी व विदेशी दारु आढळून आली व ती दारु व्यंकटरावपेठा येथील रेणुका तोर्रेम हिला पोहचवून देण्यात येत होती, असे पोलिसांना चौकशीदरम्यान आढळून आले. पोलिसांनी आरोपी प्रणव बाला यास पकडले. मात्र, किशोर चंदू कुंडू, रा.नरेंद्रपूर, किरण सल्लम रा.आलापल्ली, तुषार कुंडू व किशोर शेडमाके हे फरार होण्यात यशस्वी झाले. हवालदार बाळा देवाजी ताकसांडे यांच्या तक्रारीवरुन अहेरी पोलिसांनी आरोपींविरुद्ध भादंवि कलम ३०७, ३५३, १४३, १४७, १४८ व १४९, सहकलम ६५(ई) मुंबई दारुबंदी कायदा सहकलम १८४ व ११९ मोक्का अन्वये गुन्हा दाखल केला. अहेरीचे तत्कालिन पोलिस निरीक्षक अनिल बडगुजर यांनी आरोपींना अटक करुन साक्षदारांचे जवाब नोंदविल्यानंतर गुन्ह्याचा तपास पूर्ण करुन प्रकरण न्यायालयात वर्ग केले.

आज या प्रकरणाचा निकाल लागला. सत्र न्यायालयाने साक्ष पुरावा तपासून व सरकारी पक्षाचा युक्तिवाद ग्राह्य मानून आरोपी प्रणव बाला यास ५ वर्षांचा सश्रम कारावास व २६०० रुपयांच्या दंडाची शिक्षा सुनावली. उर्वरित आरोपींची पुराव्याअभावी निर्दोष मुक्तता करण्यात आली.

सरकारी पक्षातर्फे जिल्हा सरकारी वकील अनिल प्रधान यांनी काम पाहिले. कोर्ट पैरवी अधिकारी म्हणून सहायक पोलिस निरीक्षक प्रफुल्ल कदम यांनी जबाबदारी सांभाळली.